खाद-बीज बंटवारा मं लापरवाही ऊपर भड़के अशोक साहू, कहिन- किसान उठाव बेरा सजग रहंय, अपन हक ले समझौता झन करंय
पाटन। खाद अउ बीज बंटवारा मं होवत देरी अउ किसान मन ला तय मापदंड के मुताबिक खाद नइ मिलत के मामला अब जोर पकड़त हवय। दिशा कमेटी दुर्ग के बैठक मं विधायक प्रतिनिधि अशोक साहू ए मुद्दा ला प्रमुखता ले उठाइस अउ किसान मन के समस्या ऊपर गहिर चिंता जताइस।
अशोक साहू कहिन कि खाद अउ बीज बंटवारा लगभग महीना भर के देरी के बाद चालू हो पाइस, फेर अब घलो कई समिति मन मं किसान मन ला तय मापदंड के हिसाब ले खाद नइ मिलत हे। ए स्थिति किसान मन बर चिंता के बात आय।
ओमन कहिन कि खाद अउ बीज उठाव करत बखत किसान मन मात्रा अउ गुणवत्ता दूनों के जांच जरूर करंय, ताकि कोनो किसिम के गड़बड़ी ले बांचे जा सके। खेती-किसानी के बेरा बहुते महत्तम होथे अउ अइसने बखत मं खाद-बीज के कमी या बंटवारा मं लापरवाही के सीधा असर किसान मन के फसल अउ आर्थिक हालत ऊपर पड़थे।
दिशा कमेटी के बैठक मं अशोक साहू ए प्रशासन के ध्यान ए मुद्दा ऊपर आकृष्ट कराइस, ताकि खाद-बीज बंटवारा के व्यवस्था पारदर्शी अउ सुचारु बन सके।
कांग्रेस नेता अशोक साहू कहिन कि किसान मन ला ओकर पूरा हक मिलना चाही। ए खातिर जनप्रतिनिधि मन लगातार आवाज उठावत हवंय अउ किसान हित मं लड़ई जारी रही।
