कमरछठ परब मं जिला पंचायत सभापति कल्पना नारद साहू के बधाई संदेश, महतारी मन के तप-त्याग अउ मया के बखान
पाटन। पाटन विधानसभा क्षेत्र अंतर्गत जिला पंचायत क्षेत्र क्रमांक 12 के जिला पंचायत सभापति श्रीमती कल्पना नारद साहू ह कमरछठ परब के पावन अवसर मं क्षेत्र के जम्मो मातृशक्ति, उपासनिन, लइका मन अउ नागरिक मनला गाड़ा-गाड़ा बधाई अउ सुभकामना देय हवंय।
श्रीमती साहू ह कहिन कि कमरछठ हमर छत्तीसगढ़ के लोकपरंपरा, संस्कृति अउ मातृशक्ति के अटूट आस्था के परब आय। ये दिन महतारी मन अपन लइका मन के सुख, निरोगी काया अउ दीर्घायु जिनगी के कामना ले कठिन उपास रखथें। महतारी मन के ये तपस्या, मया अउ त्याग हमर समाज के संस्कार अउ पारिवारिक मूल्यमन के मजबूत आधार आय।
महुआ के पतरी मं, पसहर के भात।
मिंझर के चुरही, भाजी के छै जात।।
भंइस के दही संग, पाबोन परसाद।
दाई पोता मार के, दिही आसिरबाद।।
महतारी मन लइका खातिर, करे हे उपास।
जुग-जुग जिए मोर लइका, अइसे बिस्वास।।
महतारी मन के सदा, सजे रहय सिंगार।
जम्मो झन बर सुग्घर हो, कमरछठ तिहार।।
जिला पंचायत सभापति श्रीमती कल्पना नारद साहू ह कहिन कि हमर लोकपर्व मन सिरिफ धार्मिक आस्था तक सीमित नइ होवय, बल्कि ये हमर सामाजिक एकता, आपसी भाईचारा अउ छत्तीसगढ़ी संस्कृति के पहचान घलो आय। आज के पीढ़ी ला अपन पुरखा मन के परंपरा, संस्कार अउ लोक संस्कृति ले जोड़े रखना हम सबके सामूहिक जिम्मेदारी आय।
उहां ह कमरछठ परब के अवसर मं जम्मो महतारी मन के मनोकामना पूरा होय, परिवार मं सुख-शांति, समृद्धि अउ खुशहाली बने रहय, अइसने मंगल कामना करत क्षेत्रवासी मनला पुनः हार्दिक बधाई अउ सुभकामना प्रेषित करिन।
