खाद-बीज के कमी अउ प्रधानमंत्री आवास के मुद्दा ला लेके 18 जून ला पाटन मं होही जल सत्याग्रह
पाटन। पाटन विकासखंड के 35 सेवा सहकारी समितिमन के माध्यम ले किसान मन ला खाद अउ बीज के वितरण करे जाथे, फेर ए साल खाद के भारी किल्लत ले किसान मन बहुते परेशान हवंय। बड़े किसान मन ला खाद खातिर दू-तीन बेर सरकारी समितिमन के चक्कर लगाना पड़त हे, त कई समितिमन मं किसान मन बिहान 4 बजे ले ऋण पुस्तिका लेके लाइन मं खड़े रहिथें अउ अपन बारी के इंतजार करथें।
जनकल्याण समिति के अध्यक्ष युगल किशोर आडिल कहिन कि ए साल खाद के कमी ले किसान मन गंभीर संकट मं हवंय। डीएपी खाद के उपलब्धता बहुते कम हे, जबकि खेती-किसानी के शुरुआती समय मं डीएपी के सबसे जियादा जरूरत रहिथे। खाद के कमी होही त उत्पादन ऊपर घलो असर पड़ही। किसान मन बर खेतीच एकमात्र आय के साधन आय। खेती ले मिले आमदनी ले किसान अपन परिवार के पालन-पोषण, लइका मन के पढ़ई-लिखई, बिहाव अउ मकान निर्माण जइसने जरूरी काम पूरा करथें।
आडिल कहिन कि छत्तीसगढ़ सरकार किसान मन ला समय मं खाद अउ बीज उपलब्ध करवाय मं नाकाम साबित होवत हे। ओमन ए घलो बताइन कि प्रधानमंत्री आवास योजना अंतर्गत स्वीकृत आवास मन ला नोडल अधिकारी मन के द्वारा गलत तरीका ले अपात्र कर दे गेय हे। ए मामला मं प्रभावित हितग्राही मन लगातार अधिकारी मन ले संपर्क करके दस्तावेज के पुनः जांच कर पात्र घोषित करे के मांग करत हवंय।
ए संबंध मं हितग्राही मन जिला पंचायत सीईओ बजरंग दुबे, अतिरिक्त कलेक्टर डॉ. योगिता देवांगन अउ संचालक तारेन प्रकाश सिन्हा तक अपन बात रख चुके हवंय, फेर अधिकारी मन सिरिफ आश्वासन देके गरीब अउ जरूरतमंद हितग्राही मन ला खाली हाथ वापस भेज देथें।
पाटन ब्लॉक के सब्बो 35 सरकारी समितिमन मं पर्याप्त मात्रा मं खाद अउ बीज उपलब्ध करवाय जाए अउ अपात्र करे गे प्रधानमंत्री आवास मन ला पुनः पात्र घोषित करके हितग्राही मन ला लाभ दे जाए, ए मांग ला लेके 18 जून, गुरुवार के बिहान 9 बजे शिव मंदिर मं पूजा-अर्चना के बाद लक्ष्मी सागर तालाब मं जल सत्याग्रह शुरू करे जाही।
आंदोलन के सूचना शासन-प्रशासन ला दे दी गे हे। ए जल सत्याग्रह मं कुर्मी गुंडरा सहित आसपास के अनेकों गांव के किसान मन शामिल होहीं।
बैठक मं महेश साहू, रुपनारायण वर्मा, मुकेश वर्मा, तरुण साहू, कृष्णा साहू, राजेश साहू, परमानंद पटेल, गोरे वर्मा, चंद्रहास यादव, बीरेंद्र साहू, लुम्मन वर्मा, रोहित सेन, भागवत सेन, आशाराम वर्मा, कामिनी ठाकुर, नोमीन ठाकुर, पंचदेव साहू, किशोर चंद्राकर, मिलन साहू, बीरेंद्र पटेल, सेवा साहू, मनोज साहू, डोमन ठाकुर, लखन ठाकुर, महादेव ठाकुर सहित बड़ी संख्या मं ग्रामीणजन उपस्थित रहिन।
