चक्रवाती तूफान ले किसान मन के फसल म भारी नुकसान, सरपंच खिलेश मारकंडे ह सरकार ले करे मुआवजा के मांग

पाटन, सेलुद। हाल ही म आए चक्रवाती तूफान अउ बेमौसम बारिश के असर ले क्षेत्र के किसान मन के फसल ल भारी नुकसान पहुंचे हे। खेत म खड़े धान के फसल तेज हवा के चलते जमीन म बिछ गे हे। कई खेत म पानी भर गे हे, जेखर ले तैयार फसल के सड़े के खतरा बढ़ गे हे। अइसन स्थिति म किसान मन के सामने आर्थिक संकट खड़े हो गे हे।

ग्राम पंचायत सेलुद के सरपंच खिलेश मारकंडे ह किसान मन के समस्या ल सुनत हुए शासन-प्रशासन ले जल्द राहत अउ उचित मुआवजा दे के मांग करे हे।

सरपंच मारकंडे ह कहिन कि किसान मन दिन-रात मेहनत करके, अपन पूंजी लगाके फसल तैयार करथें। फेर प्राकृतिक आपदा के चलते किसान मन के मेहनत म पानी फिर गे हे। फसल खराब होए ले किसान मन के ऊपर कर्जा अउ परिवार के गुजर-बसर के चिंता बढ़ गे हे।

ओमन शासन-प्रशासन ले मांग करे हें कि प्रभावित किसान मन ल राहत दे बर तत्काल ये कदम उठाए जाएं—

1. तत्काल फसल सर्वे अउ गिरदावरी: राजस्व अउ कृषि विभाग के संयुक्त टीम बनाके प्रभावित खेत मन के मौका जांच कर नुकसान के निष्पक्ष आकलन करे जाए।

2. जल्दी मुआवजा के भुगतान: आपदा राहत कोष के तहत प्रभावित किसान मन ल प्रति एकड़ के हिसाब ले उचित आर्थिक सहायता राशि जल्दी प्रदान करे जाए।

3. फसल बीमा के लाभ: प्रधानमंत्री फसल बीमा योजना के तहत बीमा दावा के प्रक्रिया सरल बनाके किसान मन के खाता म जल्द राशि जमा करे जाए।

4. कर्जा वसूली म राहत: किसान मन के ऊपर बैंक ऋण वसूली ल फिलहाल स्थगित करके आगामी फसल के लिए रियायती दर म खाद अउ बीज उपलब्ध कराए जाए।

सरपंच खिलेश मारकंडे ह कहिन कि किसान मन के दुख-दर्द ल समझना शासन-प्रशासन के जिम्मेदारी आय। अगर समय रहते किसान मन ल उचित मुआवजा अउ राहत नइ मिलही, त पंचायत स्तर के जनप्रतिनिधि मन किसान मन के हक म उच्च अधिकारी मन ले मिलके मांग उठाहीं अउ जरूरी कदम उठाहीं।

वहीं, क्षेत्र के किसान मन घलो सरपंच के पहल के समर्थन करत शासन-प्रशासन ले मांग करे हें कि फसल नुकसान के जल्द सर्वे कराके प्रभावित किसान मन ल बिना देरी के मुआवजा दे जाए, ताकि किसान मन ल आर्थिक संकट ले राहत मिल सके।