जामगांव आर ले भरर तक सचिव महेंद्र साहू के तबादला विवाद गरमाय, राजनीति के शिकार होवत हे कहिके चर्चा जोर पकड़े हवय
पाटन। जनपद पंचायत पाटन इलाका म पदस्थ पंचायत सचिव महेंद्र साहू ला लेके उठत विवाद अब तक थमई के नाम नइ लेवत हे। ग्राम पंचायत ला राष्ट्रीय स्तर म पहचान दिलाय म अहम भूमिका निभाय वाला ए सचिव अब राजनीति के शिकार होवत हे कहिके चर्चा जोर पकड़े हवय।
इलाका के मनखे मन ये सवाल उठा थें कि का सच म सचिव ले कोनो गलती होइस हे, अऊ जिला प्रशासन ए मामला म चुप्पी काबर साधे हवय? का ए मामला म पंचायत विभाग या जिम्मेदार अधिकारी मन घलो कहीं न कहीं संलिप्त हवंय?
अब ए विवाद ग्राम पंचायत भरर तक पहुंच गे हवय, जिहां पंचायत प्रतिनिधि मन सचिव के पदस्थापना के खिलाफ विरोध दर्ज करत प्रशासन ले फेर सोच-विचार करे के मांग करत हवंय। भरर के सरपंच कौशिल्या साहू जनपद पंचायत पाटन के मुख्य कार्यपालन अधिकारी ला ज्ञापन सौंप के महेंद्र साहू ला पंचायत म पदस्थ नई करे के आग्रह करे हवंय।
ज्ञापन म गांव के परिस्थिति अऊ पंचायत के सुचारू संचालन ला ध्यान म रखके वैकल्पिक व्यवस्था करे के बात कहे गे हवय।
जानकारी के मुताबिक, ए विवाद के शुरुआत ग्राम पंचायत पतोरा ले होइस रहिस, जिहां पंचायत प्रतिनिधि मन सचिव के तबादला के मांग करत पंचायत भवन म तालाबंदी के चेतावनी दे रहिन। ओकर बाद 2 फरवरी ला प्रशासन आदेश जारी करके ओला ग्राम पंचायत जामगांव आर म पदस्थ करे रहिस।
फेर जामगांव आर म कार्यभार ग्रहण करे के पहिलीच 14 दिन के भीतर फेर तबादला करके ग्राम पंचायत पहडोर भेज दे गीस। उहां घलो सचिव के पदस्थापना के खबर मिलतेच सरपंच अऊ ग्रामीण मन विरोध करत तालाबंदी के चेतावनी दे दीन।
स्थिति ला देखत 11 मार्च ला जिला पंचायत स्तर ले तीसरी बेर आदेश जारी होइस अऊ महेंद्र साहू ला ग्राम पंचायत भरर म पदस्थ करे गीस। अब भरर म घलो विरोध के आवाज उठत हवय, जेन ले ए मामला प्रशासनिक अऊ राजनीतिक गलियारा म चर्चा के विषय बन गे हवय।
गौरतलब हे कि एखर पहिली ग्राम धौराभांठा म पदस्थापना के दौरान सरपंच के खिलाफ अविश्वास प्रस्ताव पारित होइस रहिस, अऊ ग्राम पंचायत पतोरा म कार्यकाल के दौरान धारा 40 के कार्रवाई घलो सामने आय रहिस।
इही के संग-संग ए बात घलो सामने आवत हवय कि सचिव महेंद्र साहू जहां-जहां पदस्थ रहिन, उहां पंचायत म कामकाज अऊ विकास के काम घलो बढ़िया ढंग ले होइस अऊ राष्ट्रीय स्तर म पहचान बनाय म योगदान दे रहिन।
अब देखना ये रहि गे हवय कि प्रशासन ए पूरा मामला म का निर्णय लेथे अऊ सचिव महेंद्र साहू के लगातार तबादला के सिलसिला इहिच थमही या फेर कोनो नवा आदेश जारी होही।
वर्जन: ग्राम पंचायत भरर सरपंच घलो आवेदन दे हे की महेंद्र साहू सचिव का पदस्थापना भरर मत करव, प्रशासनिक आदेश निरस्त नई हो सके प्रशासन के निर्देश के पालन होही। जनपद सीईओ पाटन
