भरर मं भव्य कर्मा महोत्सव अऊ सामूहिक आदर्श बिहाव सफलतापूर्वक संपन्न, पूर्व मुख्यमंत्री रहिन प्रथम सत्र मं मुख्य अतिथि

जामगांव आर। तहसील साहू संघ पाटन के तत्वाधान मं जामगांव आर परिक्षेत्र के ग्राम भरर मं 25 अऊ 26 अप्रैल ला दू दिवसीय भव्य कर्मा महोत्सव अऊ सामूहिक आदर्श बिहाव के आयोजन सफलतापूर्वक पूरा होइस। कार्यक्रम के सुरुवात भक्त माता कर्मा के 1010 दीया ले सजे भव्य महाआरती ले होइस, जेन ले पूरा माहौल मं श्रद्धा अऊ उत्साह के माहौल बन गिस।
कार्यक्रम के पहिली दिन मुख्य अतिथि भूपेश बघेल ह सामूहिक आदर्श बिहाव के सराहना करत कहिन कि ए किसिम के आयोजन समाज बर बहुत प्रेरणादायी हवय। ए ले परिवार मन ऊपर आर्थिक बोझ कम होथे अऊ समाजिक समरसता घलो बढ़थे। ओमन कहिन कि अभी के समय मं समाज मं नवा-नवा विकृति उभरत हवय, जेला दूर करे बर सबो ला मिलजुल के काम करे के जरूरत हवय। ओमन ए बात घलो बताइन कि साहू समाज अपन दान राशि ले अलग-अलग गांव मं भवन बनाके एकता अऊ सहयोग के बढ़िया मिसाल पेश करे हवय। संग मं ग्राम पंचायत के मांग ऊपर पुल निर्माण के स्वीकृति देय के भरोसा घलो देइन।

विशिष्ट अतिथि ताम्रध्वज साहू कहिन कि हाल ही मं स्थानीय ले लेके प्रदेश स्तर तक चुनाव संपन्न होए हवय, अइसन मं पदाधिकारी मन ला घमंड अऊ अहंकार ले दूर रहिके विनम्रता ले काम करे के चाही अऊ जियादा ले जियादा लोगन ला समाज के मुख्यधारा मं जोड़े के कोशिश करे के चाही। ओमन कहिन कि संगठन के मुख्य उद्देश्य समाज के बुराई मन ला दूर करना हवय अऊ आजकल प्री-वेडिंग जइसन चलन घलो सामाजिक विकृति बनत जात हवय।
प्रदेश महासचिव राजेश साहू कहिन कि न्याय प्रकोष्ठ के बैठक मं अंतरजातीय प्रकरण के संख्या बढ़त जात हवय, जेन चिंता के बात हवय। ओमन जोर देके कहिन कि उच्च शिक्षा संग-संग संस्कार अऊ सभ्यता ला बनाए रखना घलो जरूरी हवय।

जिला साहू संघ दुर्ग के अध्यक्ष नंदलाल साहू कहिन कि समाज के योजना मन ला हर इकाई तक पहुंचाय के जिम्मेदारी पदाधिकारी मन के हवय। ओमन कहिन कि समाज के मजबूती सिरिफ संख्या ले नइ, बल्कि गुणवत्ता ले होथे।

मुख्य अतिथि भूपेश बघेल के स्वागत तहसील साहू संघ पाटन के पदाधिकारी मन गज माला पहिराके करिन।

ए अवसर मं प्रमुख सलाहकार पुरन साहू, सरजू साहू, मोनू साहू, अशोक साहू, लालेश्वर साहू (अध्यक्ष), उपाध्यक्ष डूलेश्वर साहू, श्रीमती विमला साहू, संगठन सचिव सुरेंद साहू अऊ श्रीमती भुनेश्वरी साहू, श्रीमती गायत्री साहू, पारखत साहू, टेस राम साहू ,रामनरायण साहू , किशन हिरवानी, डीजेंद्र साहू, रूपचंद साहू, उपस्थित रहिन। कार्यक्रम के संचालन जिला महासचिव अश्वनी साहू ह करिन।