जनपद क्षेत्र क्रमांक 04 म उपचुनाव प्रक्रिया शुरू, भूपेंद्र साहू भरिन नामांकन
अम्लेश्वर/पाटन। जनपद पंचायत पाटन अंतर्गत जनपद क्षेत्र क्रमांक 04 म उपचुनाव के प्रक्रिया शुरू हो गे हे। आज ले नामांकन दाखिल करे के काम शुरू होइस, जिहां रिटर्निंग ऑफिसर पवन सिंह ठाकुर के पास प्रत्याशी मन अपन नाम निर्देशन पत्र जमा करत हें।
मिली जानकारी अनुसार जोहार छत्तीसगढ़ पार्टी के तरफ ले भूपेंद्र साहू ह जनपद सदस्य पद खातिर क्षेत्र क्रमांक 04 ले आज अपन नामांकन दाखिल करिन।
जानकारी के मुताबिक अभी तक भारतीय जनता पार्टी अउ भारतीय राष्ट्रीय कांग्रेस अपन प्रत्याशी के नाम घोषित नइ करिन हें अउ न ही नामांकन दाखिल हो पाए हे। सूत्र मन के कहना हे कि दुनों पार्टी म प्रत्याशी चयन के प्रक्रिया अभी जारी हे अउ जल्दे प्रत्याशी घोषणा के बाद नामांकन दाखिल करे जाही।
आप मन ला बता दें कि उपचुनाव बर 01 जून ला मतदान अउ 04 जून ला मतगणना होही। एला लेके प्रशासनिक तैयारी घलो लगभग पूरा कर लिहे गे हे। फिलहाल नाम निर्देशन जमा करे के प्रक्रिया जारी हे। जेन हा 18 तारिक तक चलही।
