जनपद पंचायत पाटन उपचुनाव बर मोरध्वज (मोनू) साहू बनिन चुनाव प्रभारी, जिला कांग्रेस जारी करिस आदेश
पाटन। जनपद पंचायत पाटन के क्षेत्र क्रमांक 04 म होवत उपचुनाव ला लेके जिला कांग्रेस कमेटी दुर्ग (ग्रामीण) अब संगठनात्मक गतिविधि ला तेज कर दिस हे। कांग्रेस पार्टी सर्वसम्मति ले श्रीमती उर्वशी साहू, पति स्वर्गीय शैलेश साहू ला जनपद सदस्य पद बर कांग्रेस समर्थित प्रत्याशी घोषित करे हे।
जिला कांग्रेस कमेटी दुर्ग (ग्रामीण) के जिलाध्यक्ष राकेश ठाकुर जी के निर्देश म, चुनाव के सफल संचालन, समन्वय अऊ संगठनात्मक गतिविधि मन ला मजबूत तरीका ले चलाय बर पूर्व जिला पंचायत सदस्य मोरध्वज (मोनू) साहू ला चुनाव प्रभारी नियुक्त करे गे हे।
जिला कांग्रेस के प्रभारी महामंत्री द्वारा जारी आदेश म कहे गे हे कि मोरध्वज (मोनू) साहू अपन अनुभव, संगठनात्मक क्षमता अऊ कांग्रेस विचारधारा प्रति समर्पण भावना संग काम करत कांग्रेस समर्थित प्रत्याशी के जीत सुनिश्चित करे म महत्वपूर्ण भूमिका निभाहीं।
कांग्रेस पार्टी क्षेत्र के कार्यकर्ता मन अऊ आम जनता ले अपील करे हे कि सबो झन एकजुट होके कांग्रेस प्रत्याशी ला भारी मत ले विजयी बनाय बर चुनाव प्रचार म पूरा ताकत संग भाग लेवंय। पार्टी ला भरोसा हे कि क्षेत्र के जनता कांग्रेस के नीति, विकास काम अऊ जनहितकारी सोच ऊपर भरोसा जतावत कांग्रेस समर्थित प्रत्याशी ला अपन आशीर्वाद देही।
