भिलाई-3 मं “जय श्री राम” के गूंज के संग निकलिस भव्य शोभायात्रा, श्री राम के आदर्श मन के देइस संदेस

भिलाई-3। राम नवमी के पावन अऊ मंगल घड़ी मं भिलाई-3 थाना क्षेत्र के हनुमान मंदिर प्रांगण ले भगवान श्री रामचंद्र जी के भव्य अऊ दिव्य शोभायात्रा भारी श्रद्धा अऊ उमंग के संग निकाले गीस। “जय श्री राम” के गगनभेदी गूंज ले पूरा नगर भक्तिरस मं डूब गीस अऊ चारों कोती आस्था के सुग्घर माहौल बन गीस।
ए शोभायात्रा मं जनपद पंचायत पाटन के अध्यक्ष श्रीमती कीर्ति नायक, भारतीय जनता पार्टी युवा मोर्चा के प्रदेश अध्यक्ष श्री राहुल टिकरिहा, भारतीय जनता पार्टी के जिला अध्यक्ष श्री पुरुषोत्तम देवांगन सहित कई जनप्रतिनिधि, समाजसेवी अऊ माननीय नागरिक मन उपस्थिति रहिन।
भव्य शोभायात्रा मं सुग्घर झांकी, सजे-धजे रथ, भगवा झंडा, ढोल-नगाड़ा के गूंज अऊ भक्ति संगीत ले श्रद्धालु मन भाव-विभोर हो गइन। नगर के अलग-अलग मार्ग ले गुजरत ए शोभायात्रा के जगह-जगह फूल बरसा के आत्मीय स्वागत करे गीस।
ए अवसर मं उपस्थित अतिथि मन भगवान श्री राम के जीवन के मूल मूल्य—मर्यादा, सत्य, करुणा, त्याग, कर्तव्यनिष्ठा अऊ न्याय—ला समाज बर प्रेरणा के स्रोत बताइन। ओमन कहिन कि श्री राम के आदर्श जीवन हमन ला सद्भाव, अनुशासन अऊ सेवा भावना के संग आगू बढ़े के सीख देथे।
कार्यक्रम के सफल आयोजन मं स्थानीय नागरिक, युवा मन, मातृशक्ति अऊ सामाजिक संगठन मन के सराहनीय भागीदारी रहिस।
“जय श्री राम” के गूंज के संग भिलाई-3 पूरा राममय होगे रहिस।