धान खरीदी केंद्र म उठाव ठप, पाटन के समिति मन ऊपर बढ़त हवय रख-रखाव के संकट
पाटन। दुर्ग जिला के पाटन ब्लॉक अंतर्गत सेवा सहकारी समिति मन के धान खरीदी केंद्र म धान के उठाव नइ होवत हे, जेन से समिति प्रबंधक मन ला भंडारण अऊ रख-रखाव के भारी चिंता सतावत हवय।
जानकारी मुताबिक 15 नवंबर ले छत्तीसगढ़ सरकार द्वारा समर्थन मूल्य म धान खरीदी सुरू करे गे रहिस, जऊन 31 जनवरी तक लगातार चलिस। ए दौरान मिलर मन सिरिफ सीमित मात्रा म धान के उठाव करिन, फेर अभी के हालत ये हवय कि खरीदी खतम होए दू महीना बीत गे हे, तभो ले समिति मन म धान के उठाव लगभग ठप परे हवय।
मिली जानकारी के मुताबिक डीईओ कटे के बाद घलो मिलर मन धान उठाव नइ करत हें, जेन से प्रशासन के काम-काज ऊपर सवाल उठत हवय। ब्लॉक के बड़े धान खरीदी केंद्र जइसन बठेना, बटरेल अऊ रानीतराई म धान जाम होगे हवय, फेर उठाव नइ होवत हे।
अब समिति प्रबंधन ला स्टॉक म रखे धान के सुरक्षा अऊ रख-रखाव के जिम्मेदारी उठाना परत हवय, जेन से ओमन ऊपर अतिरिक्त आर्थिक अऊ मेहनत के भार बढ़त हवय। लम्बा समय तक भंडारण होए के कारण चूहा मन के आतंक बढ़ गे हवय, बोरी फटत हवय अऊ धान खराब होए के संभावना घलो बढ़त जात हवय।
ए सब के बावजूद जिम्मेदार अधिकारी मन ए समस्या ऊपर चुप्पी साधे बइठे हें, जेन से समिति प्रबंधकमन म भारी नाराजगी देखे ला मिलत हवय।
