जनहित के मुद्दा म मुखर होईन सभापति नेहा बाबा वर्मा, परिषद बैठक म पानी, सड़क अऊ सुरक्षा ला लेके उठाइन बड़े सवाल
पाटन। नगर पंचायत पाटन के सामान्य सभा के परिषद बैठक म सभापति नेहा बाबा वर्मा ह वार्ड क्रमांक 04 सहित पूरा नगर के ज्वलंत समस्या मन ला जोरदार ढंग ले उठाइन अऊ अधिकारी मन ले तुरते ठोस कार्रवाई के मांग करिन। बैठक भर उनकर रुख जनहित म सक्रिय अऊ साफ दिखिस।
बैठक म वो मन वार्ड क्रमांक 04 के गम्भीर पीयजल समस्या ला सबसे पहिली उठाइन। वो कहिन के इलाका अब पूरी तरह सूखा (ड्राई) होगे हवय अऊ नल-जल योजना ले सही से पानी नई मिलत हे। वो नियमित टैंकर ले पानी पहुंचाय के संग-संग अलग-अलग जगह म पानी बांटे बर प्वाइंट बनाय के मांग करिन, जिहां रोज सांझ 04 बजे ले पानी मिल सके, ताकि वार्ड के लोगन ला राहत मिलय।
सभापति ह वार्ड के शासकीय, घास अऊ आबादी जमीन के जल्दी सीमांकन करे के बात घलो रखिन, ताकि ए जमीन मन ला जनहित के योजना अऊ विकास काम बर सुरक्षित रखे जा सके।
ओमन लइका मन के जाति प्रमाण पत्र से जुड़े लंबित आवेदन मन ला घलो परिषद म उठाइन अऊ जल्दी निपटारा करे के जरूरत बताइन, ताकि परिवार मन ला फालतू परेशानी नई होय।
नगर के कॉलेज रोड म अखरा स्कूल अऊ चंदुलाल चंद्राकर कॉलेज के नजदीक होवत सड़क दुर्घटना ऊपर चिंता जतावत, ओमन ओतका जल्दी स्पीड ब्रेकर बनाय के मांग करिन, ताकि छात्र-छात्रा अऊ आम जनता के सुरक्षा सुनिश्चित हो सके।
एही कड़ी म, शुभम के मार्ट के आगू मुख्य सड़क म अव्यवस्थित पार्किंग ला गम्भीर समस्या बताइन। वो कहिन के ए स्थिति आम जनता बर खतरा बन गे हवय। ओमन जांच कराके नियम तोड़े वाले ऊपर कड़ी कार्रवाई अऊ तय समय म सही पार्किंग व्यवस्था बनाय के बात रखिन।
बीटी रोड के गुणवत्ता ऊपर उठिस सवाल
सभापति ह वार्ड क्रमांक 04 म बने बीटी रोड के गुणवत्ता ऊपर घलो गंभीर सवाल उठाइन। वो कहिन के सड़क अनुबंध के समय पूरा होए के पहिलीच उखड़ गे हवय अऊ डामर खतम होगे हवय, जेन ले जनता ला भारी दिक्कत होवत हे।
ओमन ये घलो कहिन के पिछला बैठक म अधिकारी मन अनुबंध खत्म होए के जानकारी दे रिहिन, जबकि असल म ए अवधि अप्रैल महीना तक चलत रहिस। एला जनप्रतिनिधि मन ला गुमराह करे जइसन बात बताके, ओमन जांच कराके जिम्मेदार ठेकेदार ऊपर सख्त कार्रवाई करे के मांग करिन।
सभापति नेहा बाबा वर्मा ह साफ कहिन के जनहित के मामला म कोनो भी लापरवाही अऊ गलत जानकारी बर्दाश्त नई होही। ओमन परिषद ले सब्बो मुद्दा ऊपर गंभीरता ले विचार करके जल्दी कार्रवाई करे के आग्रह करिन।
बैठक म उठाय गेय ए सब्बो मुद्दा ले साफ हे के सभापति नगर के जनता के समस्या मन ला मजबूती ले उठावत हवंय अऊ समाधान बर लगातार प्रयासरत
