भक्त माता कर्मा के 1010वीं जयंती म भरर मं होही विशाल कर्मा महोत्सव अउ सामूहिक आदर्श विवाह
जामगांव आर। तहसील साहू संघ पाटन के अगुवाई मं साहू समाज के आराध्य देवी भक्त माता कर्मा के 1010वीं जयंती के पावन अवसर मं तहसील साहू संघ पाटन, परिक्षेत्रीय साहू संघ जामगांव आर अउ भरर के स्थानीय साहू समाज के संयुक्त प्रयास ले तहसील स्तरीय विशाल कर्मा महोत्सव, सामूहिक आदर्श विवाह अउ सामाजिक सम्मान समारोह (23वां बरस) के भव्य आयोजन करे जावत हे। ए पवित्तर अवसर मं समाज के सबो झन, परिवारजन अउ संगी-साथी मन ला सादर नेवता दे गे हवय।
तहसील अध्यक्ष लालेश्वर साहू प्रेस कांफ्रेंस म जानकारी देत कहिन के ये कार्यक्रम 25 अउ 26 अप्रैल 2026 (शनिवार-अइतवार) ला होही।
25 अप्रैल (शनिवार) के दिन दुपहर 2 बजे 1010 महिला मन के भव्य कलश यात्रा निकाल जाही। सांझ 4 बजे आरती, अतिथि स्वागत, महिला सम्मेलन अउ चुलमाटी कार्यक्रम होही।
ए दिन के मुख्य अतिथि रमशीला साहू रहिहीं, कार्यक्रम के अध्यक्षता दिव्या कलिहारी करहीं। विशेष अतिथि मं चंद्रिका साहू, मंजू साहू, ललेश्वरी साहू, दामिनी साहू अउ कौशल्या साहू शामिल रहिहीं। महिला सम्मेलन के संचालन आरती साहू करहीं।
26 अप्रैल (इतवार) के दिन बिहान 10 बजे मां कर्मा के महाआरती अउ विवाह संस्कार शुरू होही। दुपहर 12 बजे पहिली सत्र मं कर्मा महोत्सव, दानवीर भामाशाह जयंती अउ सांस्कृतिक कार्यक्रम होही।
ए सत्र मं मुख्य अतिथि भूपेश बघेल रहिहीं, प्रमुख अतिथि ताम्रध्वज साहू अउ अध्यक्षता नंदलाल साहू करहीं।
दुपहर 2 बजे बरात स्वागत होही अउ करीब 15 जोड़ी के सामूहिक विवाह, पाणिग्रहण संस्कार महंत पंचम दास के मार्गदर्शन मं सम्पन्न होही।
सांझ 4 बजे दूसर सत्र मं अतिथि स्वागत, आशीर्वाद अउ विदाई कार्यक्रम होही। ए सत्र के मुख्य अतिथि विष्णुदेव साय, प्रमुख अतिथि अरुण साव अउ अध्यक्षता डॉ. नीरेंद्र साहू करहीं।
विशेष अतिथि मं गजेन्द्र यादव, विजय बघेल सहित कई गणमान्य नागरिक उपस्थित रहिहीं।
कार्यक्रम स्थल मं 26 अप्रैल ला स्वास्थ्य शिविर घलो लगाही, जेमे विशेषज्ञ डॉक्टर मन उपस्थित रहिहीं अउ समाज संग आम जनता ला लाभ मिलही। ए संग सांस्कृतिक कार्यक्रम अउ लोक गायक मन के प्रस्तुति घलो रहिही।
अंत मं तहसील अध्यक्ष लालेश्वर साहू सबो समाजजन अउ क्षेत्रवासी मन ला परिवार सहित आके कार्यक्रम ला सफल बनाय बर अपील करिन। आयोजन ला सफल बनाय मं कई पदाधिकारी अउ कार्यकर्ता मन के विशेष योगदान रहिस।
क्षेत्र के जिला पंचायत सभापति घलो कार्यक्रम ला लेके अपन तैयारी करे हे जामगांव आर म अस्पताल अऊ क्षेत्र के विकास बर मांग रखही। परिक्षेत्रीय अध्यक्ष पारखत साहू ह घलो अपन तैयारी ला लेके अब्बड गदगद हे।
