रामनवमी के पावन अवसर म अध्यक्ष कीर्ति नायक अपन गृह ग्राम बटँग म जोत-जँवारा विसर्जन कार्यक्रम म शामिल होके माता रानी के पूजा-अर्चना करिन
पाटन। जनपद पंचायत पाटन के अध्यक्ष श्रीमती कीर्ति नायक आज अपन गृह ग्राम बटँग म रामनवमी के पावन अऊ शुभ अवसर म आयोजित जँवारा विसर्जन कार्यक्रम म शामिल होके माता रानी के पूजा-अर्चना करिन। ए अवसर म गांव के बुजुर्ग मन, महतारी मन, युवा साथी मन अऊ भारी संख्या म श्रद्धालु मन उपस्थित रहिन अऊ पूरा गांव म भक्ति मय माहौल दिखिस।
जँवारा विसर्जन के ए पावन कार्यक्रम म माता रानी के जयकारा लगावत, पूरा श्रद्धा अऊ भक्ति भाव ले पूजा-अर्चना करे गीस। जम्मो श्रद्धालु मन माता रानी ले क्षेत्र के सुख-समृद्धि, शांति, उन्नति अऊ खुशहाली खातिर प्रार्थना करिन। कार्यक्रम के दौरान ग्रामवासी मन ले आत्मीय मुलाकात करके उनकर आशीर्वाद घलो ले गीस।
ए पावन अवसर म माता रानी ले ए प्रार्थना करे गीस के क्षेत्र के जम्मो परिवार मन ऊपर उनकर आशीर्वाद बने रहय, जम्मो नागरिक स्वस्थ रहंय, किसान मन के खेत म समृद्धि आवय अऊ हमर क्षेत्र निरंतर विकास के राह म आगू बढ़त रहय। ए पर्व हमर आस्था, संस्कृति अऊ एकता के प्रतीक आय, जे समाज ला जोड़े के काम करथे।
