बोरीगारका–कातरो मार्ग म पुल नइ बनाय के खिलाफ कांग्रेसी मन के घेराव, जून 2026 तक निर्माण के लिखित भरोसा मिलते आंदोलन शांत
दुर्ग। बोरीगारका ले कातरो जावत सड़क निर्माण म भारी लापरवाही ला लेके क्षेत्र म जनता अउ किसान मन म जबर आक्रोश देखे ला मिलत हे। लोक निर्माण विभाग (PWD) के बनाय ये सड़क म सिंचाई नाला होय के बाद घलो पुल नई बनाय गीस, सिरिफ पाइप डाल के सड़क बना दीस, जेन तकनीकी रूप ले गलत अउ अनुपयुक्त माने जावत हे। एखर से पानी निकासी रुक सकथे अउ खेती-किसानी म भारी नुकसान के आशंका बढ़ गे हे।
ए गंभीर समस्या ला लेके क्षेत्र के किसान मन 18 मार्च 2026 अउ 25 मार्च 2026 ला पहिली घलो आवेदन अउ शिकायत दे चुके रहिन। जल संसाधन विभाग घलो पुल निर्माण बर चिट्ठी जारी करे रहिस, फेर लोक निर्माण विभाग अब तक कऊनौ ठोस कदम नई उठाइस।
आज जिला कांग्रेस कमेटी दुर्ग (ग्रामीण) के जिलाध्यक्ष राकेश ठाकुर के अगुवाई म कांग्रेसी कार्यकर्ता अउ किसान मन कलेक्टर कार्यालय के घेराव करिन अउ कलेक्टर के नाम ज्ञापन सौंप के तुरंत पुल निर्माण के मांग रखिन।
PWD कार्यालय के घेराव अउ प्रदर्शन के बाद प्रशासन हरकत म आइस। लोक निर्माण विभाग दुर्ग के कार्यपालन अभियंता लिखित म भरोसा दिहिन के बोरीगारका–कातरो मार्ग म स्थित नाला म पक्का पुल के निर्माण जून 2026 तक पूरा करवा दीही।
ए लापरवाही के कारण करीब 1000 एकड़ खेती जमीन के सिंचाई प्रभावित होय के खतरा बने हवय, जेन ले किसान मन ला भारी आर्थिक नुकसान हो सकथे। ए मामला ला लेके किसान अउ आम जनता म भारी नाराजगी हे।
ज्ञापन म प्रमुख मांग रखे गीस के नाला म तकनीकी मानक अनुसार उच्च गुणवत्ता के पक्का पुल जल्दी शुरू करे जावय अउ समय सीमा म पूरा करे जावय। संग ही सड़क निर्माण के पूरा काम के निष्पक्ष जांच कराके दोषी अधिकारी अउ एजेंसी ऊपर कड़ी कार्रवाई करे जावय।
ए पूरा मामला म मंडल अध्यक्ष मचांदुर अउ जनपद उपाध्यक्ष राकेश हिरवानी लगातार संघर्ष करत रहिन।
जिलाध्यक्ष राकेश ठाकुर कहिन के,
“ए मामला किसान मन के हित से जुड़ाय बहुत गंभीर मुद्दा हवय। कांग्रेस पार्टी हमेशा किसान मन के संग खड़े हवय अउ उनकर अधिकार बर लड़त रही। प्रशासन के जून 2026 तक पुल बनाय के लिखित भरोसा स्वागत योग्य हवय, फेर समय म काम पूरा नई होही त कांग्रेस उग्र आंदोलन करे बर मजबूर होही।”
ज्ञापन के माध्यम ले प्रशासन ले जनहित म जल्दी कार्रवाई करे के मांग करे गीस।
ए अवसर म राकेश ठाकुर, शमशीर कुरैशी, राम सुर्यवंशी, देवेंद्र देशमुख, राकेश हिरवानी, जयप्रकाश साहू, चुम्मन यादव, झमित गायकवाड़, पुष्पा साहू, डिकेंद्र हिरवानी, तोषण साहू, द्वारिका साहू, लुकेश्वरी यादव, सुरता सिंह, शुभम बंभोले, मुन्ना पांडेय, गिरीश साहू, नीलाम्बर साहू, मोहित वालदे, किशन गजपाल, छन्नू गजपाल, शती बघेल, इंद्रकुमार यादव, रामलाल, लीमेश्वर, जानकी, चंद्रमणि, भुनेश्वरी, योगेश्वरी, मनोहर सोनबेर सहित सैकड़ों लोग उपस्थित रहिन।
