फेक अउ आपत्तिजनक एआई वीडियो बर एफआईआर के मांग, एसपी देइस 2 दिन मं कार्रवाई के भरोसा
दुर्ग। जिला कांग्रेस कमेटी दुर्ग (ग्रामीण) के जिलाध्यक्ष राकेश ठाकुर, दुर्ग शहर अध्यक्ष धीरज बाकलीवाल अउ भिलाई नगर अध्यक्ष मुकेश चंद्राकर के संयुक्त अगुवाई मं कांग्रेस के कार्यकर्ता मन पुलिस अधीक्षक दुर्ग ले भेंट करिन। ओमन सोशल मीडिया मं फैलत फेक अउ आपत्तिजनक एआई जनरेटेड वीडियो के खिलाफ कड़ा विरोध जतावत तुरते एफआईआर दर्ज करे अउ कड़ी कार्रवाई के मांग करिन।
कांग्रेस के प्रतिनिधि मंडल ह वरिष्ठ पुलिस अधीक्षक ला ज्ञापन देके बताइन कि इंस्टाग्राम मं “कांग्रेस पोल खोल” अउ “रैंडम छत्तीसगढ़” जइसन आईडी के माध्यम ले कांग्रेस के वरिष्ठ नेता अउ पूर्व मुख्यमंत्री भूपेश बघेल के छवि खराब करे के नीयत ले झूठ, भ्रामक अउ आपत्तिजनक वीडियो फैलाय जात हवय।
जिलाध्यक्ष राकेश ठाकुर कहिन कि ये सिरिफ एक व्यक्ति के चरित्र हनन नई, बल्कि समाज मं वैमनस्य फैलाय अउ राजनीति माहौल ला बिगाड़े के साजिश आय। ए तरह के काम ले कांग्रेस कार्यकर्ता मन अउ आम जनता मं भारी आक्रोश देखे ला मिलत हवय।
कांग्रेस द्वारा सौंपे गे ज्ञापन मं मांग करे गे हवय कि संबंधित इंस्टाग्राम आईडी संचालक मन के खिलाफ तुरते एफआईआर दर्ज होवय, दोषी मन के पहचान करके गिरफ्तार करे जावय अउ कड़ी कानूनी कार्रवाई होवय। संग मं ये घलो कहे गेय हवय कि आपत्तिजनक वीडियो ला तुरंत हटाके संबंधित आईडी ला स्थायी रूप ले बैन करे जावय अउ अइसने फेक अउ एआई जनरेटेड दुष्प्रचार ला रोकाय बर ठोस कदम उठाय जावय।
कांग्रेस ह चेतावनी दे हवय कि अगर जल्दी कार्रवाई नई होही, त पार्टी कार्यकर्ता मन जनआंदोलन करे बर मजबूर होही, जेन के पूरी जिम्मेदारी प्रशासन के होही। राकेश ठाकुर ह भाजपा सरकार ऊपर तंज कसत कहिन कि प्रदेश मं कानून व्यवस्था बिगड़ गे हवय अउ गृहमंत्री चुनाव प्रचार मं व्यस्त हवंय।
एसपी दुर्ग विजय अग्रवाल ह 2 दिन के भीतर कार्रवाई करे के भरोसा देइन, जेन ले कांग्रेसी मन फिलहाल शांत होगे हवंय। कांग्रेस ह साफ कहे हवय कि अगर 2 दिन मं कार्रवाई नई होही, त बड़े आंदोलन करे जाही।
ए दौरान जिला कांग्रेस कमेटी दुर्ग (ग्रामीण) के पदाधिकारी अउ कार्यकर्ता मन के साथ सैकड़ों कांग्रेसजन मौजूद रहिन।
