वादा ला पूरा करे के दिसा मं जोहार छत्तीसगढ़ पार्टी के पहिली कदम, पाहंदा मं लगिस “छत्तीसगढ़िया पीरा सुनवाई” शिविर
अमलेश्वर/पाटन। जनपद पंचायत उपचुनाव के बेरा गांव पाहंदा अऊ सांकरा के जनता ले जोहार छत्तीसगढ़ पार्टी जऊन वादा करे रहिस कि चुनाव के परिणाम कुछु घलो होवय, पार्टी जनता संग खड़े रहिही अऊ इलाका के समस्या मन के समाधान बर लगातार काम करत रहिही, ओही संकल्प ला निभावत पार्टी के द्वारा इतवार के दिन गांव पाहंदा मं “छत्तीसगढ़िया पीरा सुनवाई” नाम के विशेष जनसुनवाई शिविर के आयोजन करे गीस।
उल्लेखनीय हे कि हाल मं संपन्न जनपद पंचायत उपचुनाव मं गांव पाहंदा ले जोहार छत्तीसगढ़ पार्टी ला बढ़िया जनसमर्थन मिलिस अऊ पार्टी शानदार प्रदर्शन करिस। ए परिणाम इलाका के जनता के मन मं जोहार छत्तीसगढ़ पार्टी ऊपर बढ़त भरोसा अऊ विश्वास के प्रतीक माने जात हे।
इतवार के दिन आयोजित “छत्तीसगढ़िया पीरा सुनवाई” शिविर मं भारी संख्या मं ग्रामीण मन शामिल होइन। शिविर मं गांव के नागरिक मन सड़क, पानी, बिजली, पढ़ई, स्वास्थ्य, राजस्व, आवास, पेंशन, राशन कार्ड, अवैध कब्जा, खनन अऊ दूसर जनसमस्या मन ला पार्टी के सामने रखिन। पार्टी के टीम हर गंभीरता ले सबो समस्या मन ला सुनिस अऊ संबंधित विभाग मन तक बात पहुंचाके समाधान बर जरूरी कानूनी अऊ लोकतांत्रिक लड़ई लड़ईया के भरोसा दिस।
जोहार छत्तीसगढ़ पार्टी के पदाधिकारी मन कहिन कि चुनाव सिरिफ जनप्रतिनिधि चुने के माध्यम आय, फेर जनता के सेवा अऊ अधिकार बर लड़ई लगातार चलत रहिथे। एही सोच संग पार्टी हर चुनाव खतम होय के बाद घलो जनता के बीच मं रहिके ओकर समस्या मन ला सुने अऊ समाधान बर संघर्ष करे के फैसला करे हे।
शिविर के दौरान व्यापक सदस्यता अभियान घलो चलाय गीस, जेमां गांव पाहंदा के सैकड़ों युवा, महिला अऊ ग्रामीण मन जोहार छत्तीसगढ़ पार्टी के सदस्यता ग्रहण करिन। ग्रामीण मन पार्टी के जनहितकारी सोच अऊ क्षेत्रीय मुद्दा मन ऊपर संघर्षशील भूमिका मं भरोसा जतावत संगठन संग जुड़े के निर्णय लिन।
पार्टी नेतृत्व हर बताइस कि “छत्तीसगढ़िया पीरा सुनवाई” अभियान सिरिफ पाहंदा तक सीमित नइ रहिही, बल्कि आने वाला दिन मं एला पूरा पाटन विधानसभा क्षेत्र के गांव-गांव तक पहुंचाय जाही। संग-संग सदस्यता अभियान घलो लगातार जारी रहिही, ताकि छत्तीसगढ़ के माटी, संस्कृति, अधिकार अऊ जनसमस्या मन के लड़ई ला अउ मजबूत बनाय जा सके।
जोहार छत्तीसगढ़ पार्टी हर साफ कहिस कि जनता ले मिले प्रेम, विश्वास अऊ समर्थन संगठन के सबसे बड़े ताकत आय। पार्टी क्षेत्र के हर समस्या के समाधान बर लोकतांत्रिक अऊ संवैधानिक तरीका ले संघर्ष जारी रखही अऊ जनता के आवाज ला मजबूती ले उठावत रहिही।
