महतारी वंदन योजना म eKYC म आघू आवत दिक्कत ला लेके नगर कांग्रेस पाटन देइस ज्ञापन

पाटन। नगर कांग्रेस कमेटी पाटन के द्वारा महतारी वंदन योजना के हितग्राही मन ला eKYC कराय म आघू आवत गंभीर दिक्कत मन ला लेके अनुविभागीय अधिकारी (राजस्व) पाटन ला ज्ञापन सौंपे गीस।

ज्ञापन म बताय गीस के शासन द्वारा तय कम समय-सीमा अऊ बार-बार सर्वर म तकनीकी खराबी होए के कारण बहुतेक हितग्राही मन समय म अपन eKYC नई करा पावत हें। दूसर कति निजी चॉइस सेंटर मन म पैसा लेके तुरते eKYC करे जात हे, जेन ले आम जनता ऊपर बेवजह के आर्थिक बोझ पड़त हे।

कांग्रेसजन मन मांग करे हें के हितग्राही मन के सुविधा अऊ न्याय संगत व्यवस्था ला ध्यान म रखत हुए eKYC के समय-सीमा ला बढ़ाय जावय, ताकि कऊनो घलो हितग्राही ला मजबूरी म पैसा देके eKYC कराय के जरूरत नई परे।

ए दौरान नगर कांग्रेस कमेटी के पदाधिकारी अऊ कार्यकर्ता मन भारी संख्या म मौजूद रहिन।