गुजरात म गूंजिस छत्तीसगढ़ी भजन, पंडित युवराज पांडे के कथा ले झूम उठिन हजारों श्रद्धालु
अम्लेश्वर पाटन। गुजरात के भेस्तान म स्थित मलवेरी हेवन म 17 ले 23 अप्रैल तक चलत श्रीमद् रामकथा के पांचवां दिन मंगरवार के दिन भक्ति के अइसन गंगा बहीस कि हजारों श्रद्धालु भक्ति रस म डूब गइन।
अंतरराष्ट्रीय कथावाचक पंडित युवराज पांडे जी ह मर्यादा पुरुषोत्तम प्रभु श्री राम के वनवास, निषाद राज चरित, शबरी मिलन अऊ भरत मिलाप (भरत विलाप) के प्रसंग ला अइसन भावपूर्ण ढंग ले सुनाइन कि सुनइया मन के आंखी ले आंसू थमये के नाम नई लेवत रहिस। जब व्यासपीठ ले प्रभु राम, माता सीता अऊ लक्ष्मण के वन गमन के कथा सुनाय गिस, त पूरा पंडाल म बैठे श्रद्धालु मन भावुक हो गइन।
महाराज जी के ओजस्वी वाणी अऊ जीवंत प्रस्तुति ले अइसन लागिस जइसे त्रेतायुग के घटना आंखी के सामने घटत हवय। भरत विलाप के प्रसंग म आयोजक समिति सहित महिला-पुरुष सबो झन गहिर भाव म डूब गइन अऊ माहौल भक्ति अऊ करुणा ले भर गिस।
एही बीच पंडित युवराज पांडे जी ह छत्तीसगढ़ी म गाए भजन ले सबो झन ला झूमे बर मजबूर कर दिस। भजन के मधुरता अऊ अपन छत्तीसगढ़ी बोली के मिठास ले श्रद्धालु मन मंत्रमुग्ध हो गइन।
रामकथा अऊ भजन के आनंद लेवे बर छत्तीसगढ़ ले महाराज जी के अनन्य भक्त महेंद्र साहू अऊ सोनू साहू, तोरण अपन टीम संग गुजरात पहुंचिन हें, जिहां वो मन भक्ति कार्यक्रम म शामिल होके कथा के रस ले परिपूर्ण होवत हें।
