भाजपा के “जन आक्रोश रैली” असल मं सत्ता के दुरुपयोग – प्रशासन ला पार्टी के एजेंट बना दे हावय: राकेश ठाकुर

दुर्ग। जिला कांग्रेस कमेटी दुर्ग (ग्रामीण) के अध्यक्ष राकेश ठाकुर जनपद पंचायत पाटन ले जारी आदेश ऊपर कड़ा आपत्ति जतावत कहिन कि कथित “जन आक्रोश रैली” असल मं भाजपा के एक राजनीतिक दिखावा आय, जऊन ला सफल बनाय बर खुल्लम-खुल्ला प्रशासनिक अमला के दुरुपयोग करे जावत हावय।

राकेश ठाकुर कहिन कि ये बात बहुतेच चिंता जनक अउ शर्मनाक आय कि जनपद पंचायत जइसने संवैधानिक संस्था ला भाजपा के इशारा मं काम करे बर मजबूर करे जावत हावय। आदेश के माध्यम ले 108 ग्राम पंचायत के सरपंच अउ पंचायत अमला ऊपर भीड़ जुटाय के दबाव बनाना सीधे-सीधे लोकतंत्र के हत्या आय।

ओमन आरोप लगाइन कि भाजपा अपन राजनीतिक नाकामी अउ जनता मं घटत जनाधार ला छुपाय बर सरकारी मशीनरी के इस्तेमाल करत भीड़ खड़ा करे के कोसिस करत हावय। ये सिरिफ सत्ता के दुरुपयोग नई, बल्कि ग्रामीण जनप्रतिनिधि मन के अपमान घलो आय।

कांग्रेस अध्यक्ष साफ कहिन कि अगर भाजपा अतका लोकप्रिय आय, त अपन दम मं भीड़ जुटा के देखावय। प्रशासनिक दबाव बना के सरपंच मन ला आदेश देना बंद करय। पंचायत प्रतिनिधि मन भाजपा के कार्यकर्ता नई हवंय, जऊन मन ला निर्देश दे के रैली मं भीड़ जुटवाय जावय।

ओमन जिला प्रशासन ला चेतावनी देत कहिन कि अगर ए प्रकार के आदेश तुरत वापस नई ले जाही, त कांग्रेस पार्टी एकर विरोध मं सड़क ले लेके न्यायालय तक लड़ई लड़े बर मजबूर होही।

राकेश ठाकुर कहिन कि कांग्रेस ए मुद्दा ला लेके पूरा जिला मं जनआंदोलन छेड़ही अउ भाजपा के ए “तानाशाही प्रवृत्ति” ला बेनकाब करही।