भाजयुमो दुर्ग के नवा कार्यकारिणी घोषित, रूपेंद्र (राजू) साहू बनिन जिला उपाध्यक्ष
अमलेश्वर। भारतीय जनता युवा मोर्चा, जिला दुर्ग के नवा कार्यकारिणी के घोषणा प्रदेश अध्यक्ष किरण सिंह देव, प्रदेश संगठन महामंत्री पवन साय, युवा मोर्चा प्रदेश अध्यक्ष राहुल तिकरिहा, संभाग प्रभारी जगन्नाथ पाणिग्रही अऊ जिला प्रभारी नंदन जैन के सहमति अऊ भाजपा जिला अध्यक्ष सुरेंद्र कौशिक के अनुमोदन ले भाजयुमो जिला अध्यक्ष हिमांशु सिंह के द्वारा करे गे हवय।
ए नवा कार्यकारिणी मं पाटन विधानसभा क्षेत्र के सक्रिय युवा नेता अऊ ग्राम पंचायत झीट के सरपंच रूपेंद्र (राजू) साहू ला जिला उपाध्यक्ष के महत्वपूर्ण जिम्मेदारी सौंपे गे हवय। ओकर मनोनयन ले कार्यकर्ता अऊ समर्थक मन मं भारी उत्साह देखे जावत हवय।
जारी आदेश के मुताबिक ए नियुक्ति पार्टी के वरिष्ठ नेतृत्व के मार्गदर्शन मं करे गे हवय, जेमां संगठन के मजबूती अऊ युवा मन के भागीदारी ला प्राथमिकता दे गे हवय।
रूपेंद्र (राजू) साहू बड़ दिन ले संगठन मं सक्रिय रहिन हवंय अऊ सामाजिक अऊ राजनीतिक गतिविधि मन मं उनकर सराहनीय भागीदारी रहिस हवय।
स्थानीय कार्यकर्ता मन खुशी जतावत कहिन के उनकर नेतृत्व मं संगठन अउ मजबूत होही अऊ युवा मन के आवाज ला मजबूत मंच मिलही।
रूपेंद्र (राजू) साहू ए जिम्मेदारी बर पार्टी नेतृत्व के आभार जतावत कहिन के वो संगठन के अपेक्षा मं खरा उतरय के पूरा कोसिस करहीं अऊ पार्टी के नीति-रीति ला जन-जन तक पहुंचाय बर लगातार काम करत रहिहीं।
